15.000 матуранти од целата држава седнаа во испитните клупи за да им се тестира знаењето по мајчин јазик. Почна полагањето на државната матура. Учениците пред почетокот на полагањето своите мобилни телефони ги оставија во наменските кутии и се упатија кон спортските сали. За разлика од минатата, оваа година полагањето се одвиваше со поригорозни мерки.
Според министерката Јаневска учениците нема потреба да се обидуваат да се надмудруваат со системот бидејќи матура се полага само со повторување на материјалот што веќе го совладале изминатите четири години. Матурантите, пак кои ќе се обидат да препишуваа, цела година ќе немаат право на поправен.
Од оваа година, дел од матурантите наместо во своите, средношколски клупи, седнаа во универзитетските – како дел од реформата во полагањето на државната матура. Учениците од хемиско денеска тестот го решаваа на Земјоделскиот факултет.
Покрај за мајчин јазик, за вториот дел од матурскиот испит, 13 илјади се пријавиле да полагаат странски јазик а само 1.250 се одлучиле за математика. Средношколците кои нема да ја положат матурата, ќе преполагаат во август. Резултатите ќе се знаат најдоцна еден месец по полагањето на вториот екстерен испит закажан за 11-ти јуни.
Давид Крстевски
