А во време на предизборие, манастирскиот имот „Свети Атанасиј“ на тетовското кале, пак е мета на вандали. Ги искршиле сите прозори и направиле сериозна материјална штета. Целта веројатно им била само големата штета, бидејќи од имотот не е украдено ништо. Вандалите пред да ги кршат стаклата на прозорците, го искршиле и катанецот на влезната врата на црквата. Случајот го потврдија и од секторот за внатрешни работи Тетово.
По пријавата, бил извршен увид и се преземаат мерки за расчистување на случајот, велат од тетовската полиција.
Овој упад следува откако пред нешто повеќе од една недела непознати сторители поставија знаме на Албанија на куполата на црквата и знаме на ОНА на бандера на влезот на калето. На крајот на ноември лани во тетовско, на Попова Шапка се случи сличен инцидент. Тогаш две маскирани лица го симнаа знамето на Македонската православна црква – Охридска архиепископија од јарболот во дворот на манастирскиот комплекс „Свети Наум чудотворец“ на Попова шапка и на негово место го поставија знамето на Албанија.
