Никотинот ги освојува младите. Повеќе од 70 проценти од учениците кои пушат во Македонија никогаш не биле спречени да купат цигари поради возраста. Институтот за Јавно здравје направи истражување кај децата од 13 до 15 години кое покажа загрижувачки резултати. Десет проценти од нив користат електронски цигари – повеќе од двојно зголемување во споредба со 2016 година. Дури 57 проценти од адолесцентите се изложени на тутунски чад во сопствениот дом, а 55,4 проценти во затворени јавни простории. Истражувањето е спроведено во 75 училишта, а анкетирани се речиси 5.000 ученици. Министерот Азир Алиу се надева дека со примената на новиот закон за заштита од пушење ќе се нормализира состојбата. Ќе се намали бројката на пушачи, а со тоа ќе имаме и поздрава нација.
Докторите од ИЈЗ велат дека проблемот не е само активното пушење. Пасивниот чад, агресивниот маркетинг и лесната достапност за малолетници создаваат генерација изложена на ризик.
Од СЗО откриваат загрижувачки податок дека глобално 14.000 деца на возраст од 13 до 15 години во моментов пушат тутун. Од таму велат дека предизвикот во Македонија е што тутунот е насекаде – лесно достапен и видлив. Решението го гледаат во новиот предлог закон за забрана на пушењето..
Примената на законот за пушење ќе се одвива етапно. Здравствените власти ќе им дадат една година време на угостителите за да можат да ги адаптираат терасите согласно новиот предлог закон. Наместо овие објекти да бидат отворени од 3 страни компромисот е да бидат отворени од најмалку 2 страни, а во затворените простории да не се пушат ниту електронски цигари.
