Најдобар игран филм и најдобро сценарио – и тоа од американско жири, на угледен меѓународен фестивал како што е Фестивалот на Југоисточна Европа – двете престижни награди со кои се закити македонскиот филм „Утре наутро“, по сценарио и режија на Јани Бојаџи претставуваат голем успех за македонската кинематографија – силно пробивање на меѓународната сцена. Оваа политичка драма, инспирирана од случувањата на 27 април и последиците што следуваа по нив, досега освои пет награди на меѓународни фестивали. Веројтано и поради актуелноста на темата.
„Темата со која се бави „Утре наутро“ во моментот е супер – актуелна во Србија. Тоа што нас ни се случуваше во 2017 година, сега се случува на улиците на Белград. Нема некоја голема мистификација зошто од еднаш се појави тој интерес, едноставно препознаа тема која реферира на реалноста во Србија“, вели Јани Бојаџи.
И не е само наградата. Телевизиската серија „Утре наутро“, која претставува поширока верзија на филмот, а во копродукција на ТВ Алфа, е продадена на „Прва српска телевизија“, најгледаната телевизија во Србија, каде што наскоро ќе биде емитувана премиерно. Со ова, серијата стана првата македонска телевизиска серија продадена на странски телевизиски пазар. Покрај Србија, за серијата покажаа интерес и телевизии од Хрватска и Бугарија.
„На праг сме да потпишеме договор и со една од најгледаните хрватски телевизии и со една телевизија од Бугарија. Има интерес за серијата, така да полека серијата го живее животот надвор од Македонија на што се радувам посебно“.
Успехот на „Утро наутро“ се смета за дополнителен поттик за македонската филмска продукција, но и доказ дека домашните приказни можат да допрат до регионалната публика.
