Со македонска примиера на филмот „Нема да ви се верува што се случи претходно“, дебитантско остварување на режисерот Срѓан Јаниќијевиќ, во кое кинематографер е Дејан Димески, вечер во Битола завршува ИФФК „Браќа Манаки“.
Станува збор за политички трилер со елементи на црна комедија, во чиј фокус се борбата за вистината, слободата на новинарството и обидот да се зачуваат личниот и професионалниот интегритет во општество во кое политиката, криминалот и медиумите се длабоко испреплетени.
Идејата за филмот е на Срѓан Јаниќијевиќ, сценариото е на Сашо Кокаланов и Дејан Дуковски, додека кинематографер е Дејан Димески, конкурент за главните награди на фестивалот.
Во филмот настапуваат актерите Никола Ристановски, Дарја Ризова, Сашко Коцев, Сара Сандева и Оливер Митковски.
Пред проекцијата на филмот, а според востановената традиција, на сцената во Битола ќе бидат доделени златна, сребрена и бронзена „Камера 300“, мала „Камера 300“, како и други фестивалски признанија и награди за кинематографери кои со својот професионализам се истакнаа на 47. издание на Интернационалниот фестивал на филмската камера „Браќа Манаки“.
