Првата група македонски граѓани денеска ќе биде евакуирана од Дубаи кон Скопје, изјави премиерот Христијан Мицкоски. Во наредните денови се организирани вкупно четири чартер-летови од регионот на Блискиот Исток, со кои ќе се евакуираат македонски државјани од повеќе земји, меѓу кои Катар и Кувајт.
Од Министерството за надворешни работи информираат дека, според последните податоци, амбасадата во Доха ја контактирале 150 македонски државјани, од кои 95 изразиле подготвеност за евакуација.
Амбасадата во Абу Даби ја контактирале вкупно 585 лица кои престојуваат во Обединетите Арапски Емирати, како и 36 лица од Кувајт, 15 од Бахреин и 5 од Кралството Саудиска Арабија.
Министерството ги повикува и останатите македонски државјани во регионот, доколку имаат потреба, да стапат во контакт со дипломатско-конзуларните претставништва.
