Македонците се растуриле од пазарување онлајн во првите три месеци од годината. Според податоците на Народната банка, во овој период годинава, вредноста на вкупните трансакции направени кон интернет продавниците од Македонци дома и во странство изнесува 213,3 милиони евра, што е пораст од 25,4% во однос на истиот период лани.
При тоа, кон македонските е-трговци биле направени онлајн трансакции во вредност од 133,2 милиони евра од домашни и странски иматели на платежни картички, што претставува пораст од 21,7% во однос на истиот период минатата година. Само од македонски иматели на платежни картички кон домашните е-трговци направени се трансакции со вредност од 121,2 милиони евра, односно 20,2% повеќе од лани, додека странците кон македонските е-трговци направиле трансакции во вредност од 12,1 милиони евра, кое сепак претставува пораст од 40,3 проценти.
Од друга страна, Македонците во странство направиле онлајн трансакции од 80,1 милиони евра, што претставува пораст од 32% во однос на минатата година.
