Кривична пријава за екс – членови на Владата и поранешни членови на управен и надзорен одбор на државните електрани поднело актуелното раководство на АД ЕСМ поради тоа што е направен закуп на терминал во Александрополис, а истиот не може да се користи бидејќи Македонија нема гасна инфраструктура за да го донесе.
Истовремено, со одлуки на одборите, се потпишало да се чека интерконекторот за да се донесе гасот до државата, наместо тоа да се стори преку Бугарија.
Несовесно постапувале согласно интересите на компанијата и државата, смета актуелниот директор Лазо Узунчев кој ги сподели овие информации со новинарите на брифинг. Кривичната пријава е поднесена поради нанесување штета на државата до МВР и Управата за финансиска полиција. Како што кажа, ова не е единствената кривична пријава која е поднесена од ЕСМ за предходните раководства и начинот на кој управувале со државните електрани.
Истовремено, на брифингот, присутни беа министерката за економија, Сања Божиновска, и директорите на ЕСМ, МЕПСО и МЕМО. Првиот човек на ЕСМ, Узунчев е на став дека државните електрани нема да бараат зголемување на цената на електричната енергија, а МЕПСО и МЕМО нема да бараат поскапување на струјата од Регулаторот од 1 јули.
