Чуварите, стражарите, раководството или осудениците, кој владее со затворскиот систем во Македонија што години наназад тоне во корупција. Гневната јавност бара одговори на ова прашање откако Васил Јованов, 20 годишникот што ја усмрти младата дизајнерка на пешачкиот премин кај Универзална сала, успеал во притвор да си обезбеди мобилен телефон.
Корените на длабоката корупција во затворите ширум Македонија е децениски проблем, а ниту една промена на власт не успеа да ја искорени. Општо познато е дека сите притвореници, па и осудени лица во Шутка имаат мобилни телефони. Новодојдените ги набавуваат од чуварите или од затворениците со подолг стаж.
Поранешниот началник во МВР Љубомир Ѓурчевски вели дека потребни се итни реформи на затворскиот систем во Македонија, а треба да се почне од најдолу, од корумпираните чувари и затворениците на кои им цути бизнисот зад решетки.
Покрај истражниот затвор во Шутка и за озогласеното Игризово во јавноста се говори за ланец од подмитливи чувари. Алфа досега има објавено и сведоштва на затвореници кои преживуваат рекет и уцени од затворски стражари. Јанко Јаневски е еден од нив. Тој не верувајќи во системот се одлучи јавно да говори за пеколот што го преживува.
По ова, обвинителката Лиле Стефанова од Организиран криминал се заинтересира за случајот и ги повика инволвираните на сослушување, но откако отиде во Вишото обвинителство, нема никакви информации дали имало или не корупција кај чуварите од Идризово.
Инаку, во последниот извештај на Комитетот за превенција од тортура на Советот на Европа се зборува за физичко злоставување на персоналот врз затворениците, пренатрупаност и корупција што го поткопува функционирањето на затворот, а затворениците се држат во нехумани услови.
Со доагаѓето на новата власт и поставувањето на новиот директор на затворот во Шутка, досега се направени повеќе претреси како и вонредни инспекциски надзори од страна на Управата за извршување санкции. Во повеќе наврати беа запленети мобилни телефони, дрога и недозволени предмети.
