Координаторот на Општинската организација на ВМРО ДПМНЕ во Општината Могила Оливер Ристески, после скандалот од пред четири дена, кога беше фатен со неговите комшии од полициска патрола и обвинет за крадење дрва, денеска си поднесе оставка. Тој ни рече дека таков настан не се случил и дека претставува политичка местенка. Правдата ќе ја докажува низ кривично- правна и судска разрешница, но сега не сака да и прави штета на партијата.
“Ме погоди хајката организирана од политички неистомисленици против мене како претседател на ОК на ВМРО ДПМНЕ, а втора работа, во делот на хајката, на министерот за внатрешни работи му наметнаа изјава да каже како што сработиле во СВР Битола, но не е сработено како што треба и не е точно напишано во Билетенот. Од тие причини, не сакајќи да и наштетам на партијата, си давам неотповиклива оставка од функцијата претседател на ОО на ВМРО ДПМНЕ во Општината Могила и останувам до крај на располагање на мојата матична партија” – рече Оливер Ристески.
Ристески рече дека во овој полициско- шумарски рашомон, кај лозјето над неговото село Д. Српци, неколку часа од полицијата биле задржани заедно со комшиите, меѓу кои имало и две бремени жени.
“Излеговме на патот и наеднаш полиција имаше, не запреа и не натераа да слеземе од возилото. Ние носевме алати кои требаше да го копачам старото лозје. Другите комшии кои беа позади мене, исто си идеа од режење лозје со “Лада Нива“ , сопругата на комшијата, ќерката бремена и снаата бремена. Ги извадија од колата како да се терористи. Не држеа од 12 и 40 до три пол часот на патот” – рече Ристески.
Од полицијата велат дека имало кражба на дрва и дека во време на полициски час, инволвираните биле фатени без дозвола, а неселективноста на настанот вчера ја потврди и министерот Чулев.
“Конкретниот настан е заведен во полицискиот билтен. За истото, јавноста е информирана преку медиумите и дополнително, не би сакал да навлегувам во политичката припадност на лицата што го сториле настанот. Претходно напоменав, МВР постапува неселективно спема сите граѓани што го кршат законот, па така и во конкретниот случај” – рече на вчерашниот прес министерот Чулев.
Според полициската верзија, Ристески и уште две други лица, биле фатени од шумарот како влечкаат дрва од кај врвот Древеник и веднаш ги пријавил на полиција, која потоа ги фатила кај неговото лозје, но не нашле дрва. Координаторот, пак, го тврди спротивното- дозвола не им требало оти биле во атарот на селото и го копачеле лозјето. Од ВМРО ДПМНЕ рекоа дека ќе биде избран нов координатор, а досегашниот правдата ќе ја докажува во судска постапка.
Петар Стефановски
