Заменик-министерот за образование и наука Дритон Сулејмани се обрати на јубилејното 20-то издание на Меѓународниот семинар за албанологија, кој се одржува на Универзитетот во Тетово, на тема „Албански јазични, книжевни, историски и културни случувања“.
Како што објави МОН, во обраќањето тој ја нагласи важноста на инвестирањето во научно-истражувачката дејност, во новите генерации истражувачи и во создавањето мостови на соработка меѓу универзитетите и истражувачките центри во земјата и во странство.
-Она што го чуваме како наследство, треба да го проучуваме, развиваме и да им го пренесеме на новите генерации преку знаење и академска работа, истакна Сулејмани.
На семинарот со свои научни трудови учествуваат 163 автори и коавтори, распоредени во пет сесии: лингвистика, литература, историја, етнокултура како и новинарство и медиуми. Учествуваат истражувачи, професори, академици и албанолози од земјата и странство.
