Јавното обвинителство на Македонија во соработка со проектот „Поддршка на ЕУ за владеење на правото“ денеска во Скопје организира конференција „Од стратегија до пракса: Јакнење на комуникацијата на Јавното обвинителство со јавноста“.
– Конференцијата има меѓународен карактер и на неа ќе биде презентирана новата Комуникациска стратегија на Јавното обвинителство за периодот 2026-2028 година, како и Акцискиот план и активностите за нејзина имплементација. Стратешкото планирање на комуникацијата е еден од основните изрази на посветеноста на Јавното обвинителство за дополнително зголемување на довербата на јавноста во јавнообвинителската работа, информира прес-службата на Јавното обвинителство.
Оттаму најавуваат дека настанот ќе ги собере претставниците на Јавното обвинителство, на медиумите, како и меѓународни и национални експерти кои треба да дискутираат за важноста на стратешкиот пристап кон транспарентноста на Обвинителството и комуникацијата со јавноста за предметите од висок јавен интерес.
На конференцијата ќе се обратат државниот јавен обвинител Ненад Савески, како и Елвин Вели, претседател на Здружението на јавните обвинители, Ирина Трајкоска Стрезоски, директорка на Академијата за судии и јавни обвинители, Младен Чадиковски, претседател на Здружението на новинари на Македонија (ЗНМ) и Гжегож Борковски, судија, лидер на компонента за правосудство, „Поддршка на ЕУ за владеење на правото“.
