Во Собранието денеска се одржа работна средба на членовите на Комисијата за финансирање и буџет со претставници на Центарот за економски анализи (ЦЕА), на тема „Зајакнување на улогата на Собранието во подобрување на транспарентноста, вклучувањето на јавноста и надзорот врз буџетот“.
На средбата, како што информираат од собраниската прес-служба, пoкрај претседателката на Комисијата Сања Лукаревска и заменик-претседателката Јованка Тренчевска, присуствуваа и членовите на Комисијата Игор Здравковски, Јулија Тушевска и Фатмир Битиќи, заменикот-членот Александар Јамалов како и пратеникот Златко Пенков.
Претседателката на Комисијата, Лукаревска, изразила подготвеност за продлабочување на соработката меѓу Комисијата и Центарот за економски анализи, со цел унапредување на парламентарниот надзор и зголемување на транспарентноста во процесот на буџетирање.
Претставничката на Центарот за економски анализи, Весна Гарванлиева-Андонова, се осврнала на наодите и препораките од анализите поврзани со фискалната транспарентност, вклучувањето на јавноста во буџетските процеси и надзорот врз јавните финансии. Таа ги презентираше состојбите во однос на фискалната стратегија на државата, како и степенот на достапност на буџетските документи за пошироката јавност.
Присутните, се вели во соопштението, се согласиле дека транспарентното управување со јавните финансии, навременото информирање на граѓаните и ефективниот парламентарен надзор претставуваат клучни предуслови за зајакнување на довербата во институциите и за обезбедување одговорно и отчетно трошење на буџетските средства.
