Околу 15% помалку или 10.000 евра годишно, Општина Кочани ќе штеди струја од уличното осветлување. Практично, ова е првиот град во државата каде се инсталира ваков паметен систем. Уредите се поставени на 69 контролни кутии. Светилките и сензорите се прилагодуваат на интензитетот на светлина и временските услови, како и движењата на возилата и граѓаните.
„ Администраторот од своето работно место ќе може сам да ги следи светилките и граѓаните нема да мора да се јавуват и да пријавуват доколку некоја не работи. Тоа ќе се следи од канцеларија„ изјави Љупчо Папазов, градоначалник на Кочани.
Досегашните анализи укажуваат дека со овој систем, освен што ќе се заштеди, заради намалување на емисиите на стакленички гасови и јаглероден моноксид, ќе се подобри и квалитетот на воздух во градот. Истовремено ќе се стави крај и на кражбите на струја.
„Кога ќе има пренапони или поголема потрошувачка од потребната економскиот оператор, односно фирмата која е задолжена за одржување на уличното осветлуваање, излегува на терен и реагира на дојавата и ги отстранува евентуалните злоупотреби од системот за осветлување„ изјави Љупчо Папазов, градоначалник на Кочани
Во моментов паметниот систем, функционира само во централното градско подрачје, но во најбрзо време поради ефикасноста истиот, ќе биде инсталиран и во руралните средини. Проектот е кофинансиран од Европската Унија и германското Министерство за економска соработка и развој.
Александра Ристевска
