Погрешни споредби, неточни заклучоци, мешање на „баби и жаби“… вака директорот на Фондот за здравство, Сашо Клековски, ја оценува јавната расправа за минималната плата во Македонија.
Во однос на барањата минималната плата да достигне 600 евра и тврдењето дека земјата е на дното во регионот, Клековски посочува дека клучниот проблем е мешањето на нето и бруто платите и игнорирањето на паритетот на куповна моќ.
Тој потсетува дека „Евростат“ при споредбите користи бруто плати за да се избегнат разликите во даночните и социјалните системи. Како пример, ја наведува Црна Гора, каде минималната плата изнесува 600 евра нето, но во бруто износ е околу 670 евра, додека во Македонија е 586 евра, што, според него, покажува дека земјата не е на дното.
Разликата произлегува од пониските придонеси и даноци во Црна Гора, каде здравствениот придонес и персоналниот данок за помали плати се нула, но затоа ДДВ изнесува 21 процент, наспроти 18 проценти кај нас.
Клековски нагласува дека платите можат административно да се зголемат со намалување на даноците и придонесите, но тоа би значело повисок ДДВ и поскапување на животот.
Како клучен индикатор, тој го посочува паритетот на куповна моќ, кој покажува колку реално може да се купи со одредена плата, земајќи ги предвид цените и трошоците за живот.
Според овој индикатор, минималната бруто плата во Македонија изнесува 1.069 евра, со што земјата се позиционира пред Црна Гора, Бугарија, Чешка, Латвија и Естонија.
