Младите од Делчево, Берово, Пехчево и Македонска Каменица ќе формираат регионална мрежа на локалните младински совети. Ова денеска е потврдено на првиот регионален состанок на претставници од локалните младински совети од четирите општини кој се одржа во Делчево на кој се дискутираше и за предизвиците во работата на овие младински тела.
За прв пат младите од младинските локални совети седнаа заедно за да се договорат за идните чекори кои се во насока на активирање на младите и нивно поголемо учество во општествените текови. Тие се договорија да се изработи регионална стратегија за млади за периодот 2027-2030, со цел стратешки пристап за остварување на нивните цели, да се потпише меморандум за соработка меѓу општините и локалните младински совети.
На првиот состанок присуствуваше и градоначалникот на Делчево, Иван Гоцевски, кој истакна дека разговарале со младите и го слушамле нивниот глас и како одговорни носители на локалната власт, преземале конкретни дејства, активности во интерес на младите со цел поттикнување на нивниот активизам и нивно учество во општествените текови.
-Денес го организираме првиот регионален состанок на младите од локалните младински совети од Делчево, Берово, Пехчево и Македонска Каменица. Ова е одлична можност да се поврзат, да ги споделат своите идеи и заеднички да ги препознаат потребите и предизвиците со кои се соочуваат младите во Источниот регион. За мене младите се најважниот ресурс што го има секоја локална заедница, а нивната енергија, идеи и иницијативи се клучни за развојот на нашиот регион и мој приоритет е да создадеме услови младите да останат тука, да се развиваат, да создаваат и активно да учествуваат во животот на своите заедници. Во таа смисла и заедничката работа на стратегијата за млади треба да биде документ кој ќе произлезе од нивните реални потреби, визии и предлози. Верувам дека ова вмрежување е само почеток на една силна регионална младинска приказна – четири општини, една генерација млади и заедничка визија за иднината- нагласи Гоцевски.
Претставниците на локалните младински совети се договорија и за меѓусебна поинтензивна соработка и размена на искуства.
