Општина Кавадарци бара проектни идеи за развој на локалната заедница, информираа денеска од локалната самоуправа.
– Општина Кавадарци, во партнерство со УНДП, објавува јавен повик за поднесување предлог-проекти во рамките на Регионалната програма за локална демократија во Западен Балкан 3 (ReLOaD3), која е финансирана од Европската Унија. Се повикуваат сите граѓански организации да аплицираат со свои проектни идеи и да придонесат кон развојот на локалната заедница – појаснија од Општината.
Како што нагласија, приоритетни области за проекти се заштита на животна средина, здравство и социјална заштита, локален економски развој, како и родова еднаквост.
Рокот за пријавување е до 2 март.
– Инфо-сесијата и првиот ден од дводневната обука ќе се одржат на 4 февруари со почеток во 10 часот во големата сала во Општина Кавадарци. Вториот ден од обуката ќе се одржи на 5 февруари. Првата менторска средба е закажана за 12 февруари, а во текот на обуката ќе бидат договорени термините за преостанатите три менторски средби што ќе бидат објавени на општинската веб-страница – додадоа од локалната самоуправа.
Детаљните информации и потребната документација се достапни на веб-страницата на Општина Кавадарци.