Катната гаража во центарот на Куманово е привремено решение, ќе се дислоцира кога ќе има нови паркинг капацитети, информираше градоначалникот на општината, Максим Димитриевски. Тој објасни дека поставувањето на катната гаража било неопходно поради недостигот на паркинг места во централното градско подрачје.
– Монтажната катна гаража е само времено решение кое во овој момент е неопходно за функционирање на центарот. Во моментот кога ќе го зголемиме капацитетот за паркирање, таа ќе биде дислоцирана-изјави Димитриевски.
Како можни решенија за трајно надминување на проблемот со паркирањето, Димитриевски ги посочи просторот кај „Чоробенско Ќоше“, како и поранешно хемиско чистење на „Ленинова“.
-Имаме проблем со соработката со ПОИК, кој не ги дислоцира постојните објекти. Ќе побарам средба со директорот за да најдеме решение, а во спротивно ќе мораме да поведеме и правна постапка-рече Димитриевски.
Градоначалникот се согласи дека гаражата не е соодветно поставена, особено поради тоа што делумно го прикрива објектот на Националната установа Центар за култура „Трајко Прокопиев“, која е значаен носител на културниот живот во градот.
– Се согласувам дека не ѝ е местото таму и еден ден нема да биде. Но, ако ја отстраниме сега, ќе остане празен простор без функција и без доволно паркинг-кажа Димитриевски.
Според најавите, по дислокацијата на катната гаража, просторот ќе биде повторно уреден како отворен паркинг, со соодветно урбано решение и задржување на симболиката што ја имал во минатото.
