Катастрофални поплави, најмалку четири загинати. Бугарија се справува со една од најголемите катастрофи. Силните дождови ја блокираа сообраќајната инфраструктура и предизвикаа значителни материјални штети. Пожарникарите заедно со полицијата обезбедуваат помош за луѓето.
Во овие тешки мигови, поддршка и понуда за помош пристигна и од Македонија. Бугарскиот претседател Румен Радев упати благодарност до претседалката Гордана Сиљановска Давкова, која понудила помош во овие тешки моменти.
-Благодарност до претседателката Гордана Сиљановска Давкова за конструктивниот телефонски разговор и изразеното сочувство за жртвите од поплавите во Бугарија, како и за декларираната подготвеност на РСМ да обезбеди поддршка за справување со последиците од невремето, се заблагодари Радев.
Министерот за внатрешни работи на Бугарија Даниел Митов, по состанокот на кризниот штаб изјави дека станува збор за непремостлива катастрофа. Вели институциите прават се со цел да се справат со последиците.
-Апел до луѓето кои се евакуираат: да не се спротивставуваат на евакуацијата, според прогнозите ќе продолжи да врне, иако не толку обилно. Почвата е доволно натопена за да не апсорбира повеќе вода. Барем 24 часа не треба да се презема ризик, додека не се промени прогнозата, подобро е луѓето да бидат евакуирани за да нема опасност по нивното здравје и живот, изјави Митов.
Според информациите, ситуацијата постепено се стабилизира, но метеоролозите предупредуваат на продолжени врнежи и можни силни врнежи во текот на следните денови, што би претставувале закана за можни нови поплави.
Матеја Петровски