Градоначалникот на Тетово и кандидат за втор мандат Биљал Касами информираше дека почнуваат градежни работи за пробивање на уште еден дел од трасата за продолжување на булеварот „Видое Смилески Бато“, кој ќе го поврзе градот со регионалниот пат Тетово – Јажинце кај Порој. Во април годинава завршена беше делницата од 650 метри од вкупно предвидени 1783 метри во правец кон населеното место Порој.
-Должината на овој сегмент од булеварот изнесува 1,5 километри, со ширина од 7 метри. Исто така, ќе има тротоар со ширина од два метри и јавно осветлување по целата траса. На почетокот и на крајот на сегментот ќе бидат изградени два кружни тека. Овој голем проект ги поврзува Порој и Џепчиште со автопатот, целосно трансформирајќи го овој регион, информираше Биљал Касами.
За вториот мандат Касами планира завршување на продолжувањето на овој дел од булеаварот, како и нов правец кон обиколницата во насока на село Требош.
-Покрај тоа, ќе реализираме и четири мегапроекти за продолжување на другите булевари: Ќе го довршиме булеварот „Илинден“ – од Поштата до кружниот тек кај Градскиот стадион. Ќе го завршиме булеварот „Благоја Тоска“ – еден правец од стариот градски стадион до регионалниот пат Тетово – Јажинце, а другиот од Текстилното училиште до кружниот тек со булеварот „Илинден“. Ќе го продолжиме булеварот „Борис Кидрич“ – од крстосницата со булеварот „Благоја Тоска“ до Автобуската станица. Ќе го продолжиме булеварот „Илинден“ – од кружниот тек кај Универзитетот на Југоисточна Европа до надвозникот на патот кон Гостивар, истакна Касами.
Тој потсети дека во рамки на неговиот прв мандат е направено пробивање на неколку клучни правци: еден дел од булеварот „Благоја Тоска“, еден дел од булеварот „Борис Кидрич“ и уште еден дел од булеварот „Видое Смилески Бато“.
