Стрес по стрес за граѓаните со јавниот превоз. Уште едно утро наместо опуштено, граѓаните стравуваат дали навреме ќе дојде автобус за да стигнат, кој на работа, кој на лекар, кој на училиште. Сепак хаосот изостана, а решение како и многупати досега се најде во пет до дванаесет. Проблемот со гас преку ноќ се надмина, но, дилемата е до кога тоа ќе трае.
Од Синдикатот велат дека засега метан и гас има. Автобусите возат, но и понатаму главниот проблем е во тоа што нема доволен број за да се покријат потребите на граѓаните.
„Автобуси дали има доволно? Нема. Често кажувам дека нема. Но, моментално тие што сообраќаат, од вчера имаше најава дека нема доволно метан, но од синоќа имаат добиено, танкирани се сите и сите возат нормално, без никакви пречки“, изјави Изет Меџити од СПАЈС.
Предупредувања имаше уште вчера, кога ЈСП ги извести граѓаните дека состојбата може да биде критична. Тие ги известија да се подготват за можни проблеми со возниот ред, поради ремонтните активности на регионалните гасоводни системи. Граѓаните се жалат дека веќе им е преку глава да слушаат изговори и да мрзнат во утринските часови пред автобуските постојки.
Во меѓувреме, и приватните превозници, кои претходно имаа прекини во сообраќањето поради долгови, најавуваат дека ќе продолжат да возат по нормален возен ред и распоред, поради интерес на граѓаните.
