Поради можната љубов со Али Ахмети, Арбен Таравари веќе остана без двајца пратеници, а бројот на оние кои ќе го напуштат може да продолжи да расте во наредниот период. Според познавачите со овој потег сега веќе поранешниот министер за здравство ги разочара оние кои му ја дадоа поддршката, со цел ДУИ да замине во опозиција. Политичкиот аналитичар Агим Јонуз вели оти е убеден дека наредниов период голем број сопартијци ќе го напуштат Таравари.
-Водејќи се од тоа дека народот кој што го изгласа „Вреди“, бара промени, бара тоа што е ветено да се спроведе на дело, а Таравари го повлекува овој чекор не значи дека нема луѓе кои размислуваат со свој ум, своја глава, тоа не значи дека луѓе немаат дигнитет и тоа не значи дека луѓето не стојат зад она што го ветиле на гласачкото тело. Тврдам не само што сум убеден, туку тврдам допрва ќе појавуваат луѓе кои на Арбен Таравари едноставно ќе му кажат децидно не, изјави Јонуз.
Таравари важеше за најголем ривал на ДУИ додека тие беа во власта, но очигледно работите се променија во пресрет на локалните избори, па сега се очекува негов заеднички настап со Ахмети. Според Јонуз на никого не му е јасно зошто првиот човек на едно од крилата на Алијанса за Албанците се решил за ваков потег.
Хипокризијата на Таравари како елаборација зошто се повлекува од Владата и од позициите, дека албанската политичка сцена трпи штета, дека не е тоа што треба да биде итн итн. се приказни за мали деца. Само он и Али Ахмети знаат што имаат во своите глави, што договараат, што договориле и што допрва ќе прават, изјави Јонуз.
По одлуката да ја напушти владината коалиција Таравари досега остана без двајца народни избраници. Салим Сулејмани поднесе оставка од пратеничката и од сите партиски позиции во Алијанса за Албанците, а сега и Мимоза Муса, кажа дека останува дел од владиното мнозинство. Порача дека го добила гласот од оние кои се изнемоште од дводецениското владеење на ДУИ и побарале промени на политичката сцена.
Матеја Петровски