Во текот на наредната недела ќе биде објавен извештајот од стручната Комисија која ја формираше министерот за здравство за случајот со 26годишната родилка од Делчево која на 26декември почина на КАРИЛ во Скопје, најави денеска министерот за здравство Фатмир Меџити. Комисијата која е формирана по препорака на Државниот санитарен инспекторат треба да го разгледа лекувањето на родилката, но и да утврди дали се направени било какви пропусти од страна на медицинскиот персонал.
Претходно интерна Комисија за контрола на квалитет и етички прашања при штипската Болница изврши надзор, при што констатирале дека нема пропусти во третманот на пациентката. Ден подоцна на терен излезе и санитарен инспектор кој даде препорака министерот да формира стручна комисија за детално да го разгледа случајот..
Од увидот во медицинската документација санитарниот инспектор констатирал дека жената била во 39 недела од бременоста и четири дена по креирањето на упатот за следење на нормална бременост до породување се јавила во Клиничката болница во Штип. Утврдено и било намалување на плодовата вода, а откако колабирала при сместувањето веднаш и бил извршен итен царски рез. По породувањето лекарите продолжиле со интервенција во стомакот при што констатирале дека обилното крварење доага од крвен сад во близина на слезината. Пациентката запага во шокова состојба, па повторно хируршки се интервенира со вадење на слезината. Откако состојбата и понатаму продолжила да и се влошува, конзилиум од лекари одлучува родилката да ја хоспитализират на Карил каде во вечерните часови и починала.
Бебето на 26годишната родилка кое неколку дена беше на Детска клиника, веќе е дома.
Александра Ристевска
