Израелската армија тврди дека има конкретни докази за тоа дека „Хамас ги користи болниците во Газа како „инструмент за војна“.Портпаролот Даниел Хагари соопшти дека милитантите држеле заложници во детската болница во Газа.
„Под болницата, во подрумот, најдовме команден и контролен центар на Хамас, елеци за самоубиствени бомби, гранати, автомати, експлозивни направи, и друго оружје. Има знаци кои укажуваат дека Хамас овде држел заложници. Ова е под наша истрага, но имаме и разузнавачки информации кои го потврдуваат тоа. Последнава недела правевме напори за безбедна евакуација на пациентите“, истакна Хагари.
СЗО ја спореди болницата со гробишта
Светската здравствена организација соопшти дека болницата Ал-Шифа, речиси е претворена во гробишта бидејќи околу комплексот има тела кои не можат да се однесат во мртовечници или да се закопаат. Директорот на болницата Мохамед Абу Селмија, пак, тврди дека израелските власти се уште не дале дозвола телата на починатите да ги транспортираат за погреб. Најмалку 32 пациенти, вклучително и три предвремено родени бебиња, починале во изминатите три дена.
Бајден повика за внимателност и заштита на болницата во Газа
Американскиот претседател Џо Бајден го повика Израел да ја заштити главната болница во Газа.
„Не се двоумев да ја изразам мојата загриженост за она што се случува, надеж и очекување дека ќе има помалку нападни активности во однос на болницата. Болницата мора да биде заштитена“, порача Бајден.
Хамас понудиле ослободување на 50 заложници во петдневно примирје
Во меѓувреме, Хамас соопшти дека би можеле да ослободат 50 жени и деца во претдневно примирје под услов прекин на огнот и влез на хуманитарна помош за целиот Појас.
„Ги информиравме посредниците дека во петдневно примирје можеме да ослободиме 50 жени и деца и оваа бројка може и да се зголеми на 70, имајќи предвид дека ги држат повеќе фракции – но под услов ова примирје да вклучува прекин на огнот и овозможува влез на помош и хуманитарна помош за целиот наш народ низ Појасот Газа. Сепак, непријателот продолжува да одолговлекува и избегнува да го исполни својот дел, игнорирајќи ги не само животите на палестинските цивили, туку и фактот дека тие всушност ги убиваат сопствените заложници“, истакна Абу Обеида, воен портпарол на Хамас
Според последните информации на Министерството за здравство на Газа, управувано од Хамас, најмалку 11.240 Палестинци се убиени, вклучувајќи 4. 630 деца и 3.130 жени во Газа од страна на израелската војска од 7 октомври.
