Изложба на олдтајмери се реализира денеска во Кавадарци, најстарото возило е старо 98 години. Настанот е во рамките на традиционалната стопанско- туристичка и културна манифестација „Тиквешки гроздобер“, што го организира кавадаречката локална самоуправа.
-Оваа година имаме пријавено околу 70 возила. Очекуваме да дојдат малку повеќе, т.е. веќе доаѓаат некои непријавени. Интересното за оваа година е што имаме возила коишто се стари скоро 100 години, односно 98, другото е точно 90 години, имаме уште едно што е околу 86 години. Станува збор за возила што досега не дошле во Кавадарци и многу ретко се појавувале некаде низ Македонија – рече Кирил Димитров Урошев, претставник на авто – мото клубот што ја реализира изложбата.
Изложени се автомобили од разни краеви на државата.
-Сите учесници, љубители на автомобили, кои посветено и со многу љубов се грижат за нив, добиваат признание за зачувување на културното наследство, бидејќи овие автомобили се своевиден дел од културното наследство. Тие говорат за тоа, како се движеле културата и развојот на автомобилизмот – потсети тој.
