Според планираната динамика се одвиваат градежните активности за изградба на новиот резервоар за вода, наменет за потребите на жителите од село Ростуше, седиште на Општина Маврово и Ростуше.
Овој инфраструктурен проект е од витално значење за обезбедување стабилно, квалитетно и долгорочно водоснабдување за локалното население.
Увид во работите изврши градоначалникот Онер Јакупоски, кој изрази задоволство од текот и квалитетот на работите, нагласувајќи дека како локална власт се максимално фокусирани на реализација на ветените проекти.
-Интензивно се работи на сите капитални проекти кои ги започнавме во нашата општина. Новиот резервоар во Ростуше е приоритет со кој директно го подобруваме квалитетот на живот на граѓаните. Наша цел е модерна и функционална инфраструктура во секое населено место, изјави Јакупоски.
Овој проект е дел од поширокиот план за капитални инвестиции на Општината, со кои се решаваат децениски проблеми и се создаваат услови за одржлив развој на целиот регион. Се реализира со средства добиени во рамки на вториот повик за добивање средства од унгарскиот кредит.
Тогаш оваа општина доби четири проекти во вредност од 58.920.834 денари, од кои Владата финансира средства во висина од 41.861.205 денари а општина Маврово и Ростуше ќе кофинансира средства во висина од 17.059.629 денари.
