Предлог иницијативата на СДСМ за анкетна комисија за пожарот во дискотеката „Пулс“е вратен на доработка – опозициската партија не ги запазила процедурите и предложила мнозинството членови на комисијата да бидат од редовите на опозициските партии, што е спротивно на Деловникот. Спикерот Африм Гаши на редовната координација им ги посочил забелешките на пратениците и тие имаат рок од 15 дена да ги поправат грешките во документот. На брифинг со новинарите, првиот човек на Парламентот се повика на членот 124 од Деловникот, според кој се дозволува претседателското место на комисијата да припадне на опозициските партии, но не да имаат мнозинство.
На редовната средба со координаторите на пратеничките групи е констатирано дека Предлог одлуката за основање на анкетна комисија за трагичниот настан во Кочани поднесена од Левица и СДСМ не е уредна поради тоа што тие бараат да имаат мнозинство во Комисијата, а имаат и претседател, информираше Гаши.
Во меѓувреме, владејачкото мнозинство не чекаше да се доработи документот,па поднесе нова иницијатива за анкетна комисија – но поопширна – која ќе ги опфати и другите несреќи, како што се пожарот во модуларната болница, несреќата на Дурмо турс и несреќата на Беса транс.
Анкетната комисија ќе има за цел утврдување на одговорност на функционери, носители на јавни функции и други поврзани лица, како и да ги утврди околностите за постапувањето на институциите за следните трагедии/несреќи: пожарот во објект – ноќен клуб/кабаре во Кочани; – пожарот во модуларната болница во Тетово; – сообраќајната несреќа на „Дурмо Турс“ во Ласкарци; и – сообраќајната несреќа на „Беса Транс“ во Бугарија. 77 – те потписи се доказ дека ние не сакаме да ги политизираме овие трагични настани туку сакаме да помогнеме засегнатите да добијат правда, вели пратеникот од ВМРО-ДПМНЕ, Бојан Стојаноски.
Од СДСМ велат дека премиерот Мицкоски преку собранискиот спикер Гаши се обидува да ја минира Анкетната комисија.
Гаши им купи две недели на Мицкоски и ДПМНЕ но треба да знае дека нема бегање од вистината и од правдата. СДСМ ќе ги искористи сите законски и Деловнички механизми и повторно ќе поднесеме нова иницијатива. Нема да дозволиме да успее обидот на власта по секоја цена да ја спречи формирањето ниту пак работата на Анектната комисија за Кочани. Граѓаните, семејствата, јавноста треба да ја дознааат и ќе ја дознаат целата вистина за Кочани, како и на кој начин била загрозена безбедноста на присутните во објектот, кои биле институционалните пропусти, велат од СДСМ.
Согласно процедурите, иницијативата за анкетна комисија поднесена од владејачкото мнозинство треба да се најде на следната пленарна седница. Во рамки на комисиската расправа, секоја пратеничка група има право да предложи листа на сведоци и експерти, а секој поканет експерт има обврска да се појави пред пратениците.
