По 15 месеци крвав конфликт, Израел и Хамас постигнаа договор за примирје. Шестнеделното примирје ќе стапи на сила на 19-ти јануари.
Во првата фаза треба да бидат ослободени 33 израелски заложници во замена за стотици палестински затвореници. Американскиот претседател во заминување, Бајден, ја поздрави објавата, додавајќи дека американската дипломатија дала резултати.
Неговиот наследник, Трамп, пак, тврди дека „епскиот“ договор можел да биде постигнат само поради неговиот избор во ноември. Вети дека ќе работи со Израел за да обезбеди Газа никогаш повеќе да не стане засолниште на терористите.
Со договорот се предвидува и зголемување на потребната хуманитарна помош за палестинските цивили. Он го поздрави прекинот на огнот, повикувајќи ги двете страни да ги почитуваат условите. На улиците во Газа вчера вечер се славеше, во Тел Авив пак имаше измешани чувства и воздржаност.
Договорот е постигнат по неколкумесечни преговори меѓу египетските и катарските посредници, со поддршка на САД, на само неколку дена пред инаугурацијата на новоизбраниот американски претседател Трамп на 20-ти јануари. Од почетокот на војната во Газа, предизвикана од нападот на Хамас на 7-ми октомври 2023-та, загинаа над 46 илјади Палестинци.
