Во судницата во затворот во Идризово се одржа ново рочиште за пожарот во дискотеката „Пулс“. Одбраната на општинските градежни инспектори ја оспори тезата на Обвинителството дека нивното непостапување придонело за катастрофата во која загинаа 63 млади луѓе. Бранителите на обвинетите објаснија дека причината за трагедијата не произлегува од недостатоци во конструкцијата на објектот, туку од други фактори кои не биле во надлежност на градежните инспектори.
И поранешните градоначалници на Кочани негираат вина. Ратко Димитровски тврди дека, кога во 2012 година дознал дека ќе се отвора дискотеката, се обратил во Министерството за економија, но оттаму наишол на молк.
