Почна чистката во здравствените установи – девет од вкупно 14 економски директори во клиничките болници се разрешени, а за останатите пет се очекува Владата, најдоцна до петок до Собранието да го поднесе предлог-изменетиот законот за здравствена заштита. Тие ќе го отворат патот за целосно укинување на оваа позиција. Пратеничката од ВМРО-ДПМНЕ, Рашела Мизрахи е децидна дека со ова се укинува дуализмот и конечно ќе се лоцира одговорноста, ќе се пренасочатсредствата за подобрување на здравствените услуги и инфраструктура и зголемување на транспарентноста и отчетноста.
Економските директори во клиниките беа воведени пред 17 години. Во 2006 година, скопскиот Клинички центар беше поделен на 32 клиники, со 56 директори и 142 члена на управни одбори, што се покажа како дисфункционално, неодржливо и скапо решение. Денес е десетти ден од формирањето на новата Влада предводена од ВМРО-ДПМНЕ, а веќе предвидената мерка која беше и изборно ветување од програмата Платформа 1198 од страна 120, почна да се реализира, а гласи: Укинување на економските односно организационите директори на клиниките, а во цел укинување на дуализмот и лоцирање на одговорноста како и пренасочување на средствата за подобрување на здравствените услуги и инфраструктура и зголемување на транспарентноста и отчетноста, истакна Мизрахи.
Катастрофалната реализација на планот од 2006 година за организациски директори направи хаос во институциите – затоа со оваа мерка се очекува подобрување на функционалната организација преку елиминирање на врзаните потписи и сивата зона на одговорност.
Истовремено ќе се намалат непотребните и ќе се рационализираат административните трошоци преку пренасочување на средствата во сериозно потребната здравствена екипираност, континуирана едукација на кадрите и набавка на нова медицинска опрема. Ова ќе придонесе кон целосно подобрување на здравствената внатрешна и надворешна инфраструктура и здравствени услуги за сите граѓани. Здравствената нега е од витално значење за сите нас во одредено време, но јавното здравство е од витално значење за граѓаните во секое време, рече Мизрахи.
Со измените на законот,повеќе од 100 функционери низ цела Македонија веќе нема бидат на државен трошок.Од сега со клиниките и болниците ќе раководи само еден менаџер, кој ќе биде одговорен за организацијата и работењето на установата, како и за законитоста во работењето. Со овој потег на Владата, за најмалку половина милион евра ќе биде побогата здравствената каса за една година.
