Високите температури и ветрот повторно ги разгоруваат веќе изгаснатите и локализирани краци на пожарот во Чучер Сандево. Тоа дополнително им ја отежнува борбата за пламените јазици на пожарникари и локалното население. Се гасне и од копно и од воздух, а дополнително се копа земјата за да не се шири пожарот. Двата полициски хеликоптери делуваат на овој регион од рано изутрината и истурија над 70 тони вода.
Два дена екипите на терен се борат со пожарот во скопско Чучер Сандево. Директорот на ДЗС, Стојанче Ангелов вели дека во гаснењето биле вклучени повеќе противпожарни возила, но и дел од новите теренски возила кои ги набави Владата.
- „Категорично тврдат дека ниту куќите, ниту цркавата не беа реално загрозени бидејќи имаше многу пожарникари и екипи на терен. Голема благодарност до локалното население кое помагаше на пожарникарите..“ рече Ангелов – директор на ДЗС.
Пожарникарите со надчовечки напори деноноќно ги стишуваат пламените јазици на повеќе локации, но приоритет се пожарите во близина на населени места.
- „Имаме многу високи температури, но имаме и силен ветер кој не се знае на која страна ќе се насочи..“ рече Звонко Томовски – Командир на Противпожарна бригада Скопје.
Општина Чучер Сандево од синоќа прогласи вонредна состојба, а според градоначалникот од пожарот биле зафатени седум куќи – викендици, а еден од жителите завршил во болница поради вдишување чад.
