„Љубовта кон родителот е безусловна, моја главна преокупација е како да му помогнат на мојот татко да извојува победа со најтешката болест, во децениската борба за живот“, вели охриѓанката Марија Андреа.
Таа е една од многуте во државава кои не можат да го остварат правото на туѓа нега, бидејќи веќе 4 месеци не функционираат комисиите кои одлучуваат за тоа. 5400 денари, кои месечно ги добиваме за туѓа нега, за член во семејството,се пари со кои успевавме да се закрпиме и да му ги обезбедиме скапите лекови, вели Марија, без тие сретства ние не можеме да опстанеме, а камоли да преживееме.
„Татко ми е скоро 9 години болен, шест месеци откако е направен операција, имаше тумор на главата. На човекот му е потребно да има некој дома бидејќи јас и мајка ми двете работиме, нема со кого да седи, ни требаат пари. Неподвижен е, раката му е фатена, ногата му е фатена, лековите се премногу скапи”, вели Марија Андреа, ќерка на болно лице.
Проблемот не е актуелен само во Охрид и жителите на Струга, Ресен, Дебар, но и од други градови во внатрешноста не можат да го остварат правото на туѓа нега. Поради нефункционалноста на комисиите, матичните лекари не можат да закажат темин.
„Искрено да ви кажам ние порано ги праќавме на комисии каде што беа лоцирани во Битола, во Тетово, во Охрид, во Скопје меѓутоа воопшто нема никаков термин на ни една локација буквално нема термин. Термините порани ни излегуваа и ние дури едно време имавме темин за пациент Гевгелија ќе му направевме термин за нега ако живее во Струга, таму ќе најдевме слободен термин меѓутоа сега нема никаде воопшто термини нема”, вели Хаџер Алиед-матичен лекар од Струга.
Од министерството за здравство и труд и социјална политика уверуваат дека проблемот брзо ќе се надминел.
„Во овие установи, како што се Гостивар, Кичево, Кавадарци, Охрид и други, ќе бидат воспоставени нови комисии.Потоа законски, директорите на јавните здравствени установи ќе предложат членови за комисиите до Министерството за здравство кое донесува решение за формирање на комисијата за туѓа нега и помош во соодветната јавна здравствена установа”, велат од Министерството за здравство.
Во охридската општа болница веќе била формирана стручна лекарска комисија за издавање на наод, оценка и мислење за потребата од помош и нега од друго лице.
Новинар Росица Голабоска
