Граѓаните од Струмица и струмичко, кои претрпеа штети од поплавите што го зафатија регионот минатиот месец, од денеска можат да поднесуваат барање до општинската Комисија за проценка на штети. Интересот е голем, со оглед на сериозната состојба по обилните врнежи од дожд, откако реките се излееја од своите корита и направија пустош по земјоделските површини и домовите.
„Граѓаните веќе пројавуваат интерес за првично да се информираат во однос на документацијата, бидејќи еден од условите за обештетување е комплетна документација. Има разни случаи во однос на поплавите и ги информираме граѓаните да си поднесат пријави“, изјави Емилија Пандева, советник за нормативно-правни односи во Општина Струмица.
Од Општина Струмица апелираат граѓаните кои претрпеле штети, задолжително покрај потребната документација со која ќе докажат дека имотот е нивни, да поднесат и барање кое можат лично да го подигнат или да го симнат од општинската веб-страница. Документите можат да ги доставуваат најдоцна до 10 февруари, по што комисијата ќе излезе на терен за да изврши увид. Извештајот потоа ќе биде доставен до надлежните институции и министерства.
„Потребно е да се достави комплетна документација, вклучувајќи имотен лист на име на барателот и пожелно е да не биде постар од шест месеци, нотарски заверена изјава дека имотот не е осигуран, како и лични податоци и трансакциска сметка. Поплавениот имот треба да биде внесен во имотен лист, во спротивно барањето нема да биде разгледано“, објаснува Пандева, советник за нормативно-правни односи во Општина Струмица.
Обилните врнежи од дожд на 26 и 27 минатиот месец најголеми штети предизвикаа во селото Костурино, каде надојдените води од река Тркања однесоа 56 овци, една коза и 120 јагниња од бачилото на Никола Колев. Со поддршка на Министерството за земјоделство и општествено одговорни компании неговото стадо повторно ќе биде обновено. Поројните дождови направија пустош и по струмичките ниви и пластеници, а штети беа евидентирани и во селата Муртино и Сачево.
