Граѓаните чекаат на подобри услуги и пониски цени во мобилната телефонија. Сметаат дека влез на трет мрежен мобилен оператор само ќе ја усоврши мобилната телефонија во земјава. Сметаат дека во овој домен треба да има поголема конкуренција, како на пример во Грција, Бугарија, Србија, Црна Гора, Косово кои имаат по три или повеќе даватели на вакви услуги.
Подобро поголема конкуренција, отколку дуопол на две компании кои имаат слични понуди за граѓаните и фирмите и сличен удел на пазарот. Според аналитичарите, влезот на уште една компанија ќе придонесе не само кон зголемување на квалитетот, туку и забрзана дигитализација и иновации во мобилната телефонија.
„Влегувањето на трет мобилен оператор на македонскиот пазар ќе има позитивни ефекти затоа што конкуренцијата секогаш носи позитивни пазарни ефекти во насока на подобрување на квалитетот и зголемување на ефикасноста во работењето, нови иновации и подобри услуги за потрошувачите. Дополнително, се очекува зголемената конкуренција на пазарот со влегувањето на нов оператор да придонесе и во делот на воведување на нови технологии, забрзување на дигитализација и нови иновативни услуги за граѓаните и бизнисот“ – вели универзитетскиот професор Дарко Лазаров.
На почетокот на месецов унгарската 4ИГ испрати писмо со намери до Владата за влез на македонскиот пазар. На писмото му претходеше средба во Будимпешта на министерот за транспорт Александар Николовски со првиот човек на компанијата.
Николовски најави евентуален влез на 4ИГ и рече дека ако се оди со таа опција, постапката ќе биде законска и ќе се распише тендер. Целта е граѓаните да бидат позадоволни, бидејќи, според него, во моментов, не постои никаков натпревар меѓу операторите во делот на нудење на подобри услуги, ниту во делот на пониски цени за граѓаните.
Во земјава во моментов работат два мрежни, три виртуелни мрежни мобилни оператори и еден оператор препродавач. Двата најголеми оператори имаат речиси ист удел на пазарот, од околу 47%.
