По сторијата на Алфа за катастрофалната состојба во која подолго време се наоѓа зоолошката градина, адвокат ангажиран од Градот испрати демант во кој обвинуваат за изнесување наводни невистини и клевити за градоначалничката Данела Арсовска
Објавен е текст со наслов „Од најпосетувана во регионот, Арсовска скопската зоолошка градина ја претвори во масовна гробница“ во кој се изнесени невистинити тврдења за факти и обвинувања на сметка на Градоначалникот на Град Скопје, Данела Арсовска, со кој се повредва нејзината чест и углед,, стои во демантот испратен од страна на адвокатот Трајче Арсов.
Оттаму тврдат дека содржината во насловот била манипулативна и тенденциозна и ги отфрлаат обвинувањата на сметка на градоначалничкат.
Сепак, во таканаречениот демант нема никакви негирања на информациите кои ги објави ТВ Алфа. Оттука останува нејасно што се обидуваат да демантираат?
Имено во сторијата која ја објави ТВ Алфа изнесени се факти кои се јавно достапни, па од тука се поставува прашањето дали смртта на жирафата Каспер од салмонела е невистинита? Или масакарот кој беше извршен врз 10 коњи за кој и самите вработени реагираа е манипултивен и клевета? Дали смртта на слонот кој беше пренесен од зоолошката градина со багер на депонијата Дрисла е лага или можеби птичјиот грип кој и стави клуч на врата на зоолошката и го стави под ризик здравјето на вработените и посетителите е невистина која ние ја измисливме? Дали ТВ Алфа е виновна што е изгубен статусот на членка на Европската Асоцијаја на Зоолошки градини и аквариуми? Или надлежните кои раководат со зоолошката треба и мора да ја сносат вината?
Обвинувањата од страна на Град Скопје мораме да ги отфрлиме и окарактеризираме како класичен обид за заплашување со цел затскривање на вистината и замолчување на Алфа како медиум кој навремено и објективно ги информира граѓаните.
Даниел Ѓорѓевски
