Владината мерка за намалени цени на ДДВ-то на горивата е повеќе од добредојдена за граѓаните. Во услови на нафтена криза, тие велат дека Владата направила вистински потег. По ова очекуваат дека нема да има големи шокови, ниту пак гужви по бензиските на кои се навикнавме по секој нафтен ценовен шок.
Мерката за намален ДДВ за горивата од 18 на 10% беше донесена викендот на владина седница и ќе стартува од вечерва на полноќ со важност од две недели. Според направените пресметки, со намалениот данок државата се откажува од околу 7 денари од секој литар гориво кој би го добила како ДДВ. Ако се има предвид дека дневно се трошат околу 1,6 милиони литри гориво, за две недели државата ќе се откаже од нешто помалку од три милиони евра.
Од стартот на кризата, цените на нафтата драстично пораснаа. Очекувано, тоа се случи и кај нас во Македонија. Сепак она што е значајно е дека цените кај нас и натаму се меѓу најниските во регионот. Во вакви услови, стана честа слика во пограничните региони автомобили од соседството да полнат горива на нашите бензиски станици.
