Раздвижено на пазарите во пресрет на Велигден. Се купуваат јајца, зеленчук, месо се што е потребно за празничната трпеза. Граѓаните велат дека внимателно пазаруваат и ги споредуваат цените, но сепак се трудат да не се откажат од традиционалните велигденски обичаи. За многумина, Велигден е пред сè духовен празник, а трпезата, симбол на заедништво.
Предвелигденски цените на јајцата бележат силен раст, па така во маркетите една табла најчесто се продава над 300 денари. Претпразнично поскапо се продава и зеленчукот. Килограм пиперка достигнува и до 200 денари. Доматите пак се движат од околу 200 до 250 денари за килограм. Килограм јагнешко месо се движи околу 700 денари и останува еден од најголемите трошоци во семејниот буџет. Граѓаните велат дека е поскапено, но и посочуваат дека со добро планирање може да се најдат и производи по прифатливи цени.
И покрај предизвиците, граѓаните велат дека празничната атмосфера не изостанува. Според обичаите, вечерва се оди во црква каде се дочекува Христовото воскресение со кршење јајца по полноќ. На Велигден помладите одат кај повозрасните кои пак ги пречекуваат со празнична трпеза.
