Куманово заслужува поинаков концепт, различен од досегашниот, време е граѓаните на Куманово да бидат бренд, рече на денешната прес-конференција независниот кандидат за градоначалник, Горан Стојковски – Диро. Тој се заблагодари на поддршката на граѓаните во првиот круг, како и на оние кои гласаа за останатите противкандидати, посочувајќи дека кумановци потврдиле дека во градот „живее демократијата“.
-Во изминатиот период граѓаните можеа да бидат два различни концепти. Едниот концепт којшто тврди дека е потребен континуитет, континуитет којшто трае од 2008 година, наваму. Актуелниот градоначалник од 2008 година или е советник или е претседател на совет или е градоначалник и тврди дека ни ја потребен континуитет. Резултатот на тој континуитет сите го гледаме. Од друга страна имате кандидат којшто бара дисконтинуитет, којшто вели дека доста е бренд-човек, време е граѓаните на Куманово да бидат бренд. Доста е од човек што се знае, нека дојде човек што сака да работи и да учи, рече Стојковски.
Независниот кандидат повика во недела, граѓаните да излезат, да гласаат, додавајќи дека имаат избор исто како и во 1941 кога кумановци и „тогаш излегле и направиле промена којашто влезе во историјата“.
-Се надевам дека во недела ќе бидеме сведоци на уште еден историски момент во Куманово. Куманово коешто повторно ќе расте, ќе се обновува и ќе живее, рече Стојковски.
