Меѓународната заедница под будно око ги следи сите случувања, коруптивни афери, скандали во правосудниот систем, незаинтересираноста за реформи. Од нас се бара сериозна посветеност, ако сакаме да одиме напред, но – како Владата да не ги слуша. Евроамбасадорот, по средбата со претседателката на Судски совет, Весна Дамева, им порача на членовите на советот, да си свртат нова страница и да ги спроведат препораките на оценската мисија.
Се надевам дека сите членови на Судскиот совет ќе свртат нова страница и ќе се обидат да ги спроведат препораките на оценката мисија на Европската комисија. После одлуката на Управниот суд покажав заинтересираност да се сретнам со претседателката на Судскиот совет Весна Дамева. Како што можете да забележите, јас не се сретнав со нејзиниот претходник, со што ја искажавме нашата загриженост во врска со начинот на кој беше таа разрешена, но и за начинот на кој беше избран тогашниот претседател. Причината на оваа средба со Дамева беше да разговараме за состојбите во Судскиот совет, како и во врска со препораките на оценската мисија на Европската комисија и мерките кои ќе бидат преземени од страна на советот. рече денеска шефот на Делегацијата на Европската Унија, амбасадорот Дејвид Гир
Претседателката на Судскиот совет, пак, го информирала евроамбасадорот дека за секоја од препораките од Оценската мисија во врска со работата на Советот ќе бидат донесени соодветни заклучоци на работилницата „Поддршка на ЕУ за владеење на правото“ што ќе се одржи следната недела. Гир ја поздравил пресудата на Управниот суд по која Дамева повторно се врати на чело на Советот по нејзиното разрешување во мај минатата година.
Сепак, судството и натаму останува најдлабока рана. Скандалите во Судскиот совет се најдоа во Извештајот на Оценската мисија на ЕУ а таму беше нотирано дека правосудниот систем е во критична состојба и потребна е итна акција.
Претходно, алармираше и амбасадорот на Холандија, кој не ги штеди критиките кога е во прашање македонското судство. Според него две години има постојан пад на владеењето на правото, а показател за тоа се политичките влијанија врз многу одлуки на судската власт. Сепак власта критики не гледа.
