Општина Центар го реализираше настанот „Носталгија за корзо-сеќавање за едно убаво време“, вечер исполнета со музика, игра, емоции и спомени што го вратија шармот на некогашно Скопје.
Настанот, информираат од локалната самоуправа, започна со симболично корзо низ централното градско подрачје, а продолжи со игранка во ООУ „Димитар Миладинов“, каде граѓаните повторно ја почувствуваа атмосферата на незаборавните скопски прошетки и вечерите исполнети со музика и танцување.
Во топла и ведра атмосфера, повозрасните сограѓани евоцираа спомени од младоста, додека помладите имаа можност да го почувствуваат духот и традицијата на старото градско живеење.
Градоначалникот Горан Герасимовски истакна дека ваквите настани имаат посебно значење за зачувување на автентичниот дух на градот.
-Синоќа успеваме да ги вратиме барем на миг златните скопски времиња. Корзото повторно ги сплоти центарци и покажа дека блискоста, дружењето и почитта сè уште живеат меѓу нас- порача Герасимовски.
Општина Центар континуирано организира настани со кои се афирмира културното наследство на градот и воедно ги сплотува граѓаните од сите генерации.
