Сопственикот на „Дурмо Турс“, Дурмиш Белули, осуден на 10 години затвор за тешката автобуска несреќа кај Ласкарци, и денеска не се појави во затворот Идризово за да ја започне казната. Наместо тоа, тој бил хоспитализиран во Клиничката болница Тетово, каде денеска имал закажана операција на тестиси.
Белули поднел барање за одлагање, при што во образложението било наведено дека е примен во болница на 28 ноември поради здравствени проблеми. Нов термин за започнување на казната е 17 декември.
Ова е трето по ред одложување на Белули поради здравствени причини. Во меѓувреме, второобвинетиот Ремзи Мифтари, шеф на возниот парк на „Дурмо Турс“, е во бегство. Тој исто така побара одлагање на казната поради операција на хернија, но потоа не се појави во Идризово, по што беше распишана потерница.
Инаку, пресудата за двајцата е правосилна, а за разлика од нив, останатите осудени веќе се во „Идризово“: возачот Маноил Трифуновски (14 години), Јане Бобарoвски (5 години), тројцата вработени во техничкиот центар по 7 години.
Несреќата кај Ласкарци се случи во 2019 година, кога автобус на „Дурмо Турс“ излета од автопатот поради делумно неисправни сопирачки. Загинаа 14 патници, а повеќе од 50 беа повредени.
Според обвинението, автобусите биле технички прегледувани во станица што формално имала различен правен субјект, но ист сопственик – Белули.
