Претседателот на Собранието на Република Северна Македонија Африм Гаши утре ќе биде домаќин на ХХ Конференција на претседатели/спикери на Јадранско – јонската Иницијатива (ЈЈИ), што се одржува во рамките на претседавањето на нашата држава со оваа Иницијатива.
На состанокот ќе присуствуваат претседатели, заменик-претседатели и пратеници од парламентите на државите членки на ЈЈИ Република Албанија, БиХ, Хрватска, Република Грција, Црна Гора, Италијанска Република, Сан Марино, Република Србија и Република Словенија, како и претставници од Секретаријатот на ЈЈИ, како и од нашата земај како домашин на форумот.
Учесниците на Конференцијата ќе се фокусираат на две клучни теми на кои ќе бидат посветени двете сесии: „Промовирање на мирот и стабилноста преку парламентарната дипломатија“ и „Зајакнување на регионалната поврзаност: Коридорите VIII и X и улогата на парламентите“.
На Конференцијата, покрај претседателот Гаши, обраќање ќе имаат и претседателката Гордана Сиљановска-Давкова; потпретседателот на Владата и министер за транспорт, Александар Николоски; заменик-министерот за надворешни работи и надворешна трговија, Зоран Димитровски; како и други истакнати експерти во тематските области.
Се очекува Конференцијата да заврши со усвојување Заедничка изјава во која се дефинирани приоритетите на земјите членки на ЈЈИ, која ќе биде достапна на веб страницата на Собранието.
Јадранско-јонската иницијатива (ЈЈИ) која е основана на Самитот за развој и безбедност на Јадранското и Јонското Море, Анкона (Италија) на 19 и 20 мај 2000 година и чија цел е јакнењето на регионалната соработка, промоција на политичка и економска стабилност, како солидна основа за процесот на европска интеграција, ја сочинуваат четири земји членки на Европската Унија и шест земји кои не се членки на Унијата.
