Европската Унија ќе стои рамо до рамо со Македонија на евроинтегративниот пат и ќе помогне во исполнувањето на сите обврски. Предлогот на власта за уставни измени со одложено дејство не беше одбиен од шефицата на европската комисија, која од Скопје испрати охрабрувачки пораки дека Брисел ќе работи напорно за откочување на процесот. Дипломатската офанзива на премиерот Мицкоски изминатиот период во европските престолнини и обидот за лобирање кај земјите членки на ЕУ ја омекна реториката на Урсула фон дер Лајен – уверена е дека може да се надминат сите пречки.
„Скоро сме таму, знаеме дека тука се уставните измени кои вашата држава се обврза да ги имплементира и како што рековте, сега ни треба заеднички напор, соработка и дијалог – се надевам дека сите политички сили во земјата ќе се обединат да се преземе одлучен чекор напред и уверена сум како и вие дека можат да се надминат пречките кои се уште постојат“, вели Урсула фон дер Лајен.
Напорна работа за суштински реформи, негување на европските вредности и зачувано достоинство, гордост и идентитет – ова е рецептот за успех и конечно исполнување на европскиот сон според премиерот. Христијан Мицкоски и порача на шефицата на Европската комисија дека Македонија е посветена на евроинтеграциите, но и на доближување на самата ЕУ до граѓаните – преку подобрување на животот, стандардот, владеењето на правото…
„Остануваме цврсто посветени како влада на својот пат кон полноправно членство во ЕУ. Нашата визија е јасна – сакаме да бидеме дел од европското семејство споделувајќи ги истите вредности на демократија, владеење на право и почитување на човековите права. Владата ја цени заложбата на Претседателката за проширувањето на ЕУ во најскоро време. Очекуваме, ЕУ, заедно со нас, да помогне во изнаоѓање начини како да го продолжиме нашиот европски интегративен пат истовремено уважувајќи ги легитимните ставови на нашите граѓани дека во иднина нема да се соочуваме со барања кои се во длабока спротивност со идеите и вредностите на коишто почива самата ЕУ“, рече Мицкоски.
Посетата на фон дер Лајен која е во рамки на нејзината балканска турнеја доаѓа во време на дипломатската офанзива на премиерот Мицкоски кој се обидува да излобира кај земјите членки на ЕУ да се изнајде решение за деблокада на евроинтеграциите. Според премиерот, моделот на Преспанскиот договор за уставни измени со одложено дејство е прифатливо решение кое ќе не заштити од подоцнежни условувања од страна на Бугарија.
