Најбројниот факултет во земјава – Факултетот за информатички науки и компјутерско инженерство (ФИНКИ) бара од Владата решение за просторниот проблем со кој се соочува институцијата, а во спротивно најавува протести и штрајк.
Факултетот бара владата да му наложи на бирото за развој на образвоанието да напушти една од бараките во негова непосредна близина, за која велат дека ја има узурпирано.
„Доколку Владата на следната седница не донесе позитивна одлука по барањето на Факултетот, односно повторно ја одложи точката која е од суштествено значење за нормално спроведување на наставата на Факултетот, ќе бидеме приморани да преземе порадикални мерки. Факултетот задржува право, до остварување на овие барања, јавно да го искажува своето незадоволство со одржување на протести и штрајк“, соопштија од ФИНКИ.
И покрај тоа што информатиката е една од најпросперитетните науки денес, а ФИНКИ со повеќе од 5000 студенти е најголемата високообразовна установа во државата, дванаесет години откако започна со работа, тие сè уште немаат свој сопствен објект, па за настава се користат простории од други факултети, што пак им создава проблем и на студентите и на наставниот кадар.
