Одземање на лиценца за работа на две друштва за организирање игри на среќа оти не платиле ниту денар од давачките кон државата. Министерството за финансии иницираше постапка до Владата бидејќи не ги почитувале законските обврски кои се неопходни за да ја поседуваат лиценцата.
Во интерес на истрагата не се открива точно за кои друштва станува збор, но како што кажа министерката за финансии едната фирма е од Скопје и е направено огромно оштетување на државната каса.
– Кај двете друштва е констатирано дека не ги почитувале законските обврски што се однесуваат на поседување на лиценца, односно не се платени давачките согласно Законот за приредување на игри на среќа и согласно Законот за данок на личен доход. Меѓу нив се посебните давачки како и данок на личен доход од исплатени добивки на игри на среќа. Согласно доставената документација од УЈП, а согласно надворешната контрола е констатирано дека за едно од друштвата не се платени давачки од јули 2022 година, изјави министерката за финансии Гордана Димитриеска Кочоска.
Колкаво е оштетувањето на буџетот и кој се е одговорен за ваквите пропусти ќе треба да истражува финансова полиција. Пропуст е констатиран и во работењето на УЈП оти не давале извештаи за работењето на овие друштва. Од финансии побарале да им биде доставен записник уште во јули 2023 година, но повратен одговор во министерството стигнува дури откако управата добила ново раководство.
Дополнително ќе се чешла работењето на сите друштва кои се занимаваат со оваа дејност, а ќе се проверува и законитоста на оние кои се приредуваат онлајн коцкање.
Инаку, според податоците на Министерството за финансии, државата има издадено вкупно 46 лиценци за приредување игри на среќа од кои 30 за приредување на игри на среќа во автомат клуб, 8 лиценци за казино и 8 за приредување на игри на среќа во обложувалници.
