Како сцена од трилер-филм – киднапирање среде бел ден се случи во Неготино. Маж бил насилно грабнат од сопствениот двор, киднаперите го пикнале во автомобил, му ставиле ќеса на главата, го тепале и го однеле во шума за да го присилат да признае дека ја силувал сопругата на еден од киднаперите.
Основното јавно обвинителство – Кавадарци отвори истрага против двајца мажи од селото Корешница, на возраст од 37 и 30 години, осомничени за грабнување. Тие, на 12 април, со закани со пиштол го внеле оштетениот во автомобил и го однеле по стариот пат кон Демир Капија, удирајќи го и ставајќи му ќеса на главата. Кога стигнале во шума, го извадиле од возилото и го терале да слуша аудиоснимки и да признае дека тој е сниманото лице, но оштетениот за цело време негирал.
Поради тоа, двајцата осомничени му се заканувале дека ќе го силуваат и ќе го убијат, па го удирале со боксови и со пластична цевка, нанесувајќи му тешки повреди. Пред да му го фрлат мобилниот телефон, оштетениот успеал да прати порака за помош во полиција, а и соседите го виделе како влегува во возилото. Врз основа на овие информации, полицијата ги идентификувала грабнувачите ги контактирала, а тие, дознавајќи дека се откриени, го однеле тепаниот во полициската станица во Неготино. Обвинителството бара притвор за двајцата, поради опасност од бегство и повторување на делото.
