Со изложбата „Солидарноста како иднина“ во Музејот на современата уметност вечерва во Скопје ќе бидат отворени „Европските дијалози“, четиридневен меѓународен форум посветен на европското наследство, граѓанското општество и иднината на Европската Унија.
Настанот е во организација на Францускиот институт во Париз, Францускиот институт во Скопје и Амбасадата на Франција во Северна Македонија.
Преку поставката „Солидарноста како иднина“ ќе биде одбележан еден од најзначајните примери на меѓународна културна солидарност со Скопје по катастрофалниот земјотрес во 1963 година, кога голем број уметници од Франција и од други европски земји донирале свои дела за создавање на колекцијата на Музејот на современата уметност.
Посетителите ќе имаат можност да видат дела од истакнати француски, македонски и европски автори, меѓу кои Пјер Сулаж, Виктор Вазарели, Никола Мартиноски и други уметници застапени во музејската колекција.
Во рамки на „Европските дијалози“, од 29 септември до 2 октомври ќе се одржат јавни дебати, предавања, работилници, разговори и културни настани на кои ќе учествуваат истражувачи, новинари, активисти, уметници, студенти, дипломати и институционални претставници од Северна Македонија, Франција и од други европски земји.
Годинашното издание, кое претставува завршен настан од програмата „Споделени хоризонти“, ќе биде посветено на прашањата за заедничкото европско наследство, колективната меморија, граѓанските иницијативи и идните предизвици на Европската Унија.
Завршницата на манифестацијата е предвидена за 2 октомври во „Лабораториум“, каде ќе настапат францускиот диџеј Милс и скопскиот диџеј Дарко со заеднички музички перформанс.
