Промоција на физичката активност, здравите животни навики и спортот како дел од секојдневието е во фокусот на годинашната Европска недела на спортот, која преку низа настани во Скопје и Кочани ќе ги обедини рекреативците, младите, семејствата и професионалните спортисти.
Како што соопшти Министерството за спорт, во програмата е предвиден денешниот „BeActive ден“ во Кочани, кој ќе се одржи во Паркот на Револуцијата со почеток во 10 часот. Настанот ќе опфати трка на четири километри, како и целодневна програма исполнета со спортски и рекреативни содржини.
На 28 септември во СОС Детско Село во Скопје ќе се одржи „Family Move Day“ – семеен спортски ден посветен на заедничкото движење, спортот и активно поминатото време со семејството.
Европската недела на спортот ќе биде затворена на 30 септември со „Fitness Championship“, што ќе се одржи во Градскиот парк кај Школка во Скопје.
Од Министерството за спорт посочуваат дека целта на манифестацијата е да се подигне јавната свест за значењето на редовната физичка активност и да се мотивираат граѓаните, без оглед на возраста, да бидат поактивни и да усвојат здрави животни навики.
Европската недела на спортот годинава беше отворена на 23 септември со настани во „Скопје Сити Мол“ и во паркот „Расадник“ во Општина Кисела Вода.
