Лидерот на СДСМ Венко Филипче упорно не одговара чија е луксузната јахта на која во друштво со екс премиерот Зоран Заев пловеше на Халкидики пред 15-тина дена. Наместо да каже чие е скапото пловило, кој го платил возењето и дали домаќинот е Заев, а тој бил само поканетиот гостин, Филипче се правда дека тоа биле конструкции и лажни вести пласирани од страна на ВМРО-ДПМНЕ. Директно прашан за јахтата, тој почна да одговара за зграда во Дубаи, куќа во Нерези и џипови.
Во однос на тоа дали екс-премиерот влијае врз неговите политички одлуки и дали од позадина тој раководи со СДСМ, Филипче вели дека тие се само пријатели, дека Заев се повлекол од политика и дека одлуките ги носи со раководството на партијата.
Од ВМРО ДПМНЕ прашуваат зошто Филипче вели дека е жртва на пропаганда наместо да одговори, чија е јахтата.
Инаку, луксузниот одмор на Венко Филипче и Зоран Заев предизвика лавина реакции во јавноста. Според податоците кои можат да се проверат на интеренет, најверојатно не станува збор за јахта во сопстевност на Заев или Филипче, туку за пловило кое е во сопственост на грчка агенција и коешто може да се изнајми за околу 11 илјади евра за една недела.
Според инфомациите на порталот „Плус инфо“ којшто ја објави фотографијата со јахтата, по прошетката со луксузното пловило, екс и сегашниот лидер на СДСМ седнале на ручек во познатата таверна „Панос„ која се наоѓа на вториот крак на Халкидики.На ручекот, според фотографијата е и кандидатот за градоначалник на општина Аеродром, Александар Трајковски. Неговото присуство ги подгреа гласините во јавноста дека луксузното пловење не било приватен одмор, туку можеби станува збор тивко усогласување на плановите за претстојните локални избори, далеку од очите на јавноста.
Покрај одмори на јахти, двојката Заев – Филипче беа видени заедно и на гранде журка во Дубаи, каде ги забавуваше Харис Џиновиќ. Дубаи ги поврзува Заев и Филипче и по друга линија – и двајцата поседуваат златни визи за Емиратите, документ кој вообичаено се добива со инвестиција од неколку стотици илјади евра. Филипче демантираше дека имал бизнис, но, до денеска се нема откажано од својата виза.
