Два часа центарот на Скопје беше блокиран поради протест на вработените во ЈП „Паркови и зеленило“, „Флокаком“ и „Луна“. Тие на овој начин го искажаа својот револт поради неисплатените плати за август и септември.
Од 10 до 12 часот беа затворени мостот „Гоце Делчев“ и булеварите „Илинден“ и „Партизански одреди“, како последно предупредување за решавање на проблемот. Демонстрантите рекоа дека иако од Град Скопје биле префрлени околу 23 милиони денари, сепак недостигаат уште околу 25 милиони денари за исплата на заостанатите плати. Дополнително, од денеска тие остануваат без здравствено осигурување.
